Ginatahod kag gina-abi-abi ni Mayor Raisa Treñas ang desisyon sang national government nga ipaiway ang Barangay and Sangguniang Kabataan Elections (BSKE) nga nakatalana kuntani sa Nobyembre 2, 2026.
Sini lang nga udto sang ginsapubliko ni Palace Press Officer Usec. Claire Castro nga ginpirmahan na ni President Ferdinand “Bongbong” Marcos, Jr. ang hagna nga naga-postpone sang piniliay.
Sa idalom sang Republic Act No. 12326, ginsaylo ang eleksyon sa una nga Lunes sa Nobyembre 2028 kag ginpalawig man ang termino sang barangay officials halin sa apat pasaka sa lima ka tuig.
Sa interview sang Bombo Radyo kay Joy Fantilaga-Gorzal, spokesperson ni Mayor Treñas, iya ginpahayag nga ang importante para sa alkalde amo ang himuon sa dugang nga tyempo nga ihatag sa mga nagapungko nga opisyal.
Suno sa opisina sang alkalde, ang barangay officials amo ang pinaka-suod sa mga tawo sa komunidad, una nga ginapalapitan, kag amo ang mga partner sang City Government sa mga programa sang syudad.
“So, if they are given more time to serve, then we also expect more work to be done,” suno sa statement nga gin-post sang alkalde.
Bangud wala naman sang eleksyon, indi na apektado sang election ban ang City Government gani nga may dugang nga tyempo suno sa alkalde nga padayunon ang nasuguran na nga mga programa.
Partikular nga nalawagan ang “Atipan on the Move” nga dal-on mismo sa mga barangay kaupod ang iban pa nga mga programa kag serbisyo agud nga mas mapalapit ini sa mga pumuluyo.
“Here in Iloilo City Hall, mapadayon man naton ang aton mga programa kag proyekto. Since wala anay sang election, indi man kita maapektuhan sang election ban, so we have more time to continue what we have started and roll out more programs. Ilabi na ang “Atipan on the Move,” nga dal-on naton mismo sa mga barangay along with our other programs. We will continue working closely with our barangay and SK officials,” kabahin pa sang statement.
Suno kay Gorzal, ginalauman sang City Government nga kasunod sang pagpaiway sang eleksyon, mangin oportunidad ini pati sa SK officials agud nga mapasangkad nila ang ila mga programa para sa mga pamatan-on.#
