Ginklaro sang leading labour union kag shipping industry groups nga may kinamatarong ang mga seafarer nga magpamalibad sa pagsakay sa mga barko nga magaagi sa Middle East Gulf partikular na sa Strait of Hormuz.
Ini matapos ginpasaka sa pinakamataas nga lebel ang threat level sa Middle East bangud sang gyera sang Israel kag Estados Unidos sang Amerika batok sa Iran nga subong naglapta na sa amo nga rehiyon.
Ginabanta nga 300 ka mga barko ang naka-angkorahe sa magtimbang nga bahin sang Strait of Hormuz sang nag-ibwal ang tensyon sa tunga sang tatlo ka pungsod.
Halin naman sang Pebrero 28, siyam na ka mga barko ang nahalitan, kag isa ka seafarer ang napatay.
Bilang kabahin sang nakasugtan sa tunga sang mariners kag commercial shipping companies ukon International Bargaining Forum (IBF), mahimo makabalibad ang seafarers nga maglabay sa area.
Ang repatriation dapat man nga bayaran sang kumpaniya kag ang compensation katumbas sang duha ka bulan nga sweldo.
Dugang pa, sa statement sang International Transport Workers’ Federation (ITF), dapat nga taasan ang sweldo kag doblehon ang kumpensasyon pananglitan mapatay ukon mahalitan ang seafarer.
“Today’s designation ensures that seafarers on vessels covered by IBF agreements have critical protections if they operate in this dangerous region,” suno kay ITF General Secretary Stephen Cotton.
“The fact we have to take these measures at all is a damning indictment of the situation facing seafarers today. No worker should have to risk being killed or maimed simply for doing their job – particularly when that job is transporting the oil and goods that keep the world’s economies running,” dugang sini.
Sa Pilipinas, nauna na nga nagmandu ang Maritime Industry Authority (MARINA) sa tanan nga barko nga rehistrado sa Pilipinas nga nagabyahe sa luwas sang pungsod nga mas pataason ang seguridad, monitoring, kag reporting measures bangud sang nagasingki nga tensyon sa Middle East.#
