Gindala sa ospital si Sen. Ronald “Bato” Dela Rosa samtang nagapakigbato ini sa balatian nga COVID-19.
Suno sa staff sang senador, nagaamat-amat naman maayo ang pamatyag sang senador.
“Nasa hospital pa po si Sen [Dela Rosa] pero improving na daw po ang pakiramdam niya,” kabahin sang mensahe sang staff ni Dela Rosa.
Sa subong, indi pa makasabat sang anuman nga pamangkot ang senador kun san-o kag ngaa gindala siya sa ospital.
Matandaan nga Nobyembre 21 sang ginkumpirma ni Dela Rosa nga nagpositibo siya sa COVID-19.
Ang senador kag ang tatlo pa ka myembro sang iya pamilya ang nalatnan sang COVID-19 sang ila kabulig sa balay.
Ang nasambit nga kabulig ang nalatnan sang COVID-19 sang nagpagunting ini sa salon.
Si Dela Rosa ang ikalima nga senador nga nalatnan sang COVID-19.
Una na nga nagpositibo sa COVID-19 sanday Senators Juan Miguel Zubiri, Sonny Angara, Aquilino Pimentel III kag Ramon “Bong” Revilla Jr.
