Ginbuyagyag ni Senator Erwin Tulfo nga posible nga masobra 10 ka mga kongresista sa 20th Congress ang nagaserbe bilang mga supplier ukon contractor sang ila mismo nga mga government-funded infrastructure projects.
Ini ang nangin pahayag ni Tulfo matapos ginpalabtikan ni President Ferdinand “Bongbong” Marcos Jr. sa iya ikaapat nga State fo the Nation Address (SONA) sang nagligad nga semana ang pila ka mga opisyal nga ginaalegar may kaangtanan sa pagpangilkil sa flood control projects.
Suno kay Tulfo, wala siya sang klaro nga impormasyon kun may yara man sang kapareho nga sitwasyon sa Senado, bangud indi man niya kilala ang personal nga negosyo sang iya mga kaupdanan nga senador.
Pahayag pa niya nga kun may yara sang hiwaton nga hearing, posible nga ipatawag ang mga natumod nga mamalidha apang mahimo man nga manginwala ang mga ini bangud sang parliamentary courtesy.
Samtang, una naman nga ginbuyagyag ni anay Senator Panfilo “Ping” Lacson, nga nagsiling nga sa tuig 2022, may masobra 60 ka myembro sang House of Representatives ang ginatudlo nga mga contractors kag may full control sa ila mga ginapundohan nga proyekto, kag ini ang kabangdanan sang posibilidad sang conflict of interest kag korapsyon.
