Ginbuyagyag ni Senator Panfilo Ping Lacson nga may P2.5 billion ”allocables” nga gina-angot kay Sen. Imee Marcos sa 2025 National Expenditure Program (NEP).
Suno kay Lacson, kaangay sa ginatawag nga Cabral files ang pondo nga ini ginsaylo man sa 2025 General Appropriations Act (GAA) paagi sa mga insertion sa bicameral conference.
Ginpahayag sini nga kabahin sang mga allocables ni Marcos ang for later release (FLR) nga ginapaguwa sini suno sa record sang DPWH.
Ginmuno man ni Lacson ang paghipos ni Marcos sang ginatalakay ang 2026 budget sa bicam sa pihak nga ginabatikos man sang senador ang pork barrel.
Dugang pa ni Lacson, wala sang moral nga batayan si Marcos para maghatag sang kritisismo nahanungod sa budget kun siya mismo ang may pork sa nagligad nga General Appropriations Act (GAA).
Ginbatikos man sini ang pahayag ni Marcos batok sa Blue Ribbon Committee nga iya ginapamunuan kaangot sa flood control proejects.
Gilayon naman nga ginpanginwala ni Senator Marcos ang ini nga mga pahayag ni Lacson.
Samtang, wala naman naghatag sang komento si Lacson sa isyu nga possible paggamit sang pork sa impeachment ni Vice President Sara Duterte bangud posible ini nga magapungko nga mamalidha kun maga-umpisa na ang kaso.
