Nagpasalig ang Department of Education (DepEd) nga palawigon ang senior high school voucher program tubtub sa School Year 2024-2025 para sa Grade 11 students nga naka-enroll sa state and local universities and colleges.
Ginkomiter ini ni DepEd Undersecretary kag Spokesperson Michael Poa sa atubang sang House Committee on Basic Education and Culture kasunod sang mandu nga nabaton halin kay Vice President kag Education Secretary Sara Duterte.
Ginkonsiderar suno sa iya ang sitwasyon sang 17,751 learners nga yara pa sa Grade 11 sa amo nga mga buluthuan. Paagi sa pagpalawig sang voucher program, ma-cover sini ang amo kadamo nga estudyante kag pati na ang ila nga pag-eskwela sa Grade 12 sa masunod nga tuig.
Apang ginklaro man ni Poa nga kinahanglan pa ang memorandum of agreement sa tunga sang DepEd kag sang Commission on Higher Education para matigayon ang extension sang voucher program.
Sang damlag lang, matandaan nga nagmandu si CHED Chairman J. Prospero de Vera III sa SUCs kag sa LUCs nga untaton na ang SHS programs umpisa sa school year 2024-2025 bangud wala na sang legal nga basehan para diri.
Sa memorandum sang Office of the CHED Chairperson, napahayag nga ang otoridad sang SUCs kag LUCs nga makatanyag sang SHS programs ang nag-lapse na matapos ang transition period para sa K-12 system halin sa school years 2016-2017 tubtub sang 2020-2021.#
