ILOILO CITY-Desisyunan pa sang Iloilo City Council ang pagpatuman sang signal shutdown bilang paghatag seguridad sa publiko sa patigayunon nga Dinagyang Festival 2020.
Sa interview sang Bombo Radyo kay Iloilo City Councilor Jojo Javellana, chairman sang committee on Peace and Order sa konseho, iya ginpahayag nga istoryahan pa nila kun magapatuman sang signal interruption sa Enero 25 kadungan sang Dagyang sa Calle Real kag Enero 26 kadungan sang Dinagyang 360 degrees umpisa alas sais sa aga tubtob alas dos sa hapon.
Suno kay Javellana, may ginpasa sa City Council si Pol. Col. Martin Defensor Jr., director sang Iloilo CIty Police office nga naga-request sang signal shutdown kadungan sang dalagko nga kahiwatan sa Enero 25 kag 26.
Apang suno kay Javellana, mas maayo nga sa Enero 26 na lang ipatuman ang signal shutdown bangud nga kalabanan sa magatambong sa Dinagyang 360 degrees ang mga dalagko nga personalidad kag mga Very Important Persons.
Dugang pa ni Javellana, sa Huwebes, Enero 9 pa patigayunon ang deliberasyon sa konseho agud madesisyunan na ang natuhoy sa signal shutdown.
