Nagpanawagan ang Jaro Archdiocesan Commission on Prison Pastoral Care sa publiko nga mangin ma-abi-abihon kag hatagan sang “second chance” ang mga person restored of liberty ukon ang mga tawo nga nakagwa na sa jail facility.
Kabahin ini sang gin-apelar ni Commission Director Reverend Father Ildefonso Cachuela, Jr. sa Good Morning Philippines subong nga Prison Awareness Sunday nga kadungan man sang National Correctional Consciousness Week.
Sa interview sang Bombo Radyo kay Father Cachuela, iya ginpahayag nga dapat indi lamang paglimitahan sang tawo ang paghangop sa jail facility bilang isa ka presuhan, kundi isa ka “correctional” ukon lugar kun sa diin indi silot ang ginahatag kundi tyansa nga magbag-o sang kabuhi.
Sa bahin sang Simbahan, ang target sang ila mga inisyatibo bilang partner sang gobyerno kag iban pa nga non-government agencies amo ang integral formation.
Ini ang nagalakip sang mga programa para sa espiritwal nga aspeto kaangay sang sakramento kag liturhiya; education and formation; social services; kag linkages.
Dugang sini, matapos ang rehabilitation kag transformation sa sulod sang correctional facility, ang daku pa gid nga hangkat amo ang stigma ukon ang panan-aw sang tawo kun makagwa na ang anay Person Deprived of Liberty.
“We really invite you to be active partners, active nga myembro sang Simbahan, nga nagahatag sang second chance para sa aton nga mga utod nga nakaagi sa correctional facility. May we become more welcoming, more compassionate, and magahatag kita sang oportunidad sa ila nga ma-prove nila nga nagbag-o na gid man sila sa ila nga kaugalingon,” suno kay Father Cachuela.
Dugang sini: “Kabay pa nga mangin matuod gid kita nga Kristiyano Katoliko nga nakahibalo maglantaw sa tawo — regardless kun ano man ang iya nga mga naagyan in the past, nagatulok kita sa iya nga siya gintuga sang Ginuo sa Iya nawong kag kapareho.”
Nahibaluan nga ang Jaro Archdiocesan Commission on Prison Pastoral Care ang nagaserbe sa 12 jail facilities sa Iloilo kag Guimaras nga sa idalom sang teritoryo sang Archdiocese of Jaro.
Ang Prison Awareness Sunday amo ang tuigan nga obserbasyon sang Simbahan nga ginadedikar sa pagpangamuyo kag pagpalapnag sang impormasyon natuhoy sa kabuhi sang Persons Deprived of Liberty (PDLs).
Gin-establisar ini sang Catholic Bishops’ Conference of the Philippines (CBCP) sang 1987 paagi sa Episcopal Commission on Prisoners’ Welfare nga amo na subong ang Episcopal Commission on Prison Pastoral Care.#
