Gintawag sang Western Visayas Transport Cooperative (WVTC) nga “untimely” ukon indi husto ang tiyempo sang pagpatuman sang wage increase bangud sa padayon nga pagsaka sang presyo sang gatong kag iban pa nga galastuhon sa operasyon sang transport sector.
Sa interview sang Bombo Radyo kay Raymundo “Boyet” Parcon, chairperson sang WVTC, iya ginpahayag nga ila nahibaluan ang importansya sang pagpasaka sang sweldo sang mga empleyado, apang dugang ini nga kabug-at sa ila pinansyal nga obligasyon, ilabi na sa tion nga mataas ang presyo sang gatong.
Suno kay Parcon, may yara ang ila kooperatiba sang ginabulubanta 400 ka drivers kag conductors, samtang yara naman sa 300 ang nagatrabaho sa ila opisina nga nagahatag sang daku nga epekto ang pagpasaka sang minimum wage sa ila gastuhon para sa mga empleyado.
Pahayag niya, bangud sa ila ginaatubang nga sitwasyon, ginatun-an sang WVTC ang posibilidad nga magpasaka sang petition paagi sa ila abogado agud mangayo sang temporaryo nga suspension sang wage increase para sa mga transport cooperative.
Paagi sini, ginalauman sang kooperatiba nga mahibaluan kon ano ang mahimo nga tikang agud mahatagan sang solusyon ang dugang nga obligasyon sa sweldo samtang nagapadayon ang pagsaka sang presyo sang produktong petrolyo.
Dugang pa ni Parcon, nagapabilin ang kabalaka sang kooperatiba sa mataas nga operating expenses, gani nagapangita sila sang posible nga paagi agud mabalanse ang kaayuhan sang ila mga empleyado kag ang kapasidad sang cooperative nga magpadayon sa operasyon.
