Nagviral sa social media ang isa ka lalaki nga nagpatigayon sang community pantry, apang sa baylo nga pagkaon ang itanyag sang libre sa mga pumuluyo, siya mismo ang nakadisplay sa iya gintawag nga ‘Jowa Community Pantry’.
Para kay Jesse James Joves sang Pasig, kinahanglan lamang sang creativity agud makit-an niya ang iya ‘The One’.
Suno sa iya, walo na siya ka tuig nga single sa diin nagapati siya nga ini na ang tion nga magpangita na siya sang iban pa nga pamaagi agud maangkon ang ginahandom niya nga romantic relationship.
Nagplastar si Joves sang duha ka puti nga pulungkuan sa atubang sang iya balay sa diin nagpungko siya kag gintanyag ang iya kaugalingon.
Sa isa ka pulungkuan, nakabutang naman ang sa isa ka whiteboard nga ginsulatan niya sang mga tinaga nga “tall, dark, pwede na, loves the Lord, no issues, slightly used.”
Nangin agaw-atensyon si Joves sa mga naglabay nga pumuluyo sa atubang sang iya ‘Jowa Community Pantry’ sa diin madamo ang nagkuha sa iya sang picture kag gin-upload ini sa social media.
Madamo naman sang ginbilin nga makahalam-ot nga komento ang netizens sa mga naglapta nga picture ni Joves sa diin ginapahayag pa sang iban nga basi indi na masunod ang physical distancing kun pilahan ang iya ‘Jowa Community Pantry’ sang mga babaye nga single man kag available.
Abiso naman sang mga abyan ni Joves, maghulat lamang ini bangud mangin worth it man sa gihapon ang iya paghulat sa tion nga ihatag na sa iya sang Mahal nga Makaako ang babaye nga para gid sa iya.
