Nagapadayon ang follow-up investigation sang Special Investigation Team sa kamatayon ni Iloilo Dueñas Vice Mayor Aimee Paz Lamasan.
Sa interview sang Bombo Radyo kay PMAJ. Shiela Mae Sangrines, spokesperson sang Iloilo City Police Office, iya ginpahayag nga nag-rekomenda ang ICPO sa pagtukod sang Special Investigation Team Lamasan agud magbinuligay ang mga concerned units sa pag-imbestigar sang natabo.
Ginatutokan man sang Iloilo City Police Station 2 ang alegasyon sang accidental firing, apang ginatipon sang ICPO ang tanan nga impormasyon nga posible makabulig sa imbestigasyon sa insidente.
May ara sang forensic procedure nga ginahulat kag ginafollow-up.
Magluwas sa pagtukod sang SIT, nag-request man ang ICPO sang pagpaidalom sa ballistic examination sang armas nga gingamit.
Dugang pa diri nagpangayo sang voluntary consent sa live-in partner ni Lamasan para sa paraffin test, pinaagi sa abogado sini.
May ara man sang request para sa kopya sang CCTV footage sa puluy-an sang biktima, nga dako gid ang mabulig sa imbestigasyon.
Suno kay PMAJ. Sangrines, ang request para sa pagtukod sang SIT ginpadala na sa PRO6, kag ginahulat ang kopya sang order, pero padayon na ang kooperasyon sang mga pulis.
Pirmado ini ni PCol. Kim Legada, Director sang Iloilo City Police Office ang issuance sang order, kag ginapangunahan niya ang imbestigasyon.
Ginapahayag man sang Police Regional Office VI ang pagpangabay sa publiko nga indi magpalapta sang mga espekulasyon sa kamatayon ni Lamasan.
Ginpasalig nila nga ang tanan nga lead sa insidente ginatutukan, kag prayoridad ang kalidad sang imbestigasyon base sa nakuha nga mga ebidensya.
Ang pamilya sang biktima ang nagakooperar man sa padayon nga imbestigasyon, suno sa kapulisan.
