Gindeklarar na ang state of emergency sa Ukraine kadungan sang abiso sa mga pumuluyo sini nga yara pa subong sa Russia nga magbiya na sa amo nga pungsod.
Ang 30 ka adlaw nga state of emergency amo ang makadumili sa hulag sang conscripted reservists kag magapahanugot man sang personal document checks.
Sandig ini sa draft text nga aprubahan pa sang parliament. Ang restrictions naman ang ginalauman nga maga-take effect subong nga Huwebes.
Gin-anunsyo man sang Ukrainian Government ang compulsory military service para sa mga lalaki para sa ila nga ginahandaan nga away batok sa Russia.
Ini nga desisyon ang kasunod sang pagkilala ni Russian President Vladimir Putin sa independence sang duha ka rebel regions subong nga semana.
Nagmandu man si Putin sang pag-deploy sang tropa sang Russia sa amo nga mga rehiyon sa Ukraine agud nga mag-akto bilang mga peacekeepers.
Wala pa subong sang maathag nga indikasyon kun may idugang pa gid nga pwersa militar sa Ukraine.
‘MAGBIYA NA’
Ginabanta 3 million sang mga citizens sang Ukraine ang yara sa Russia kag amo subong ang ginaabisuhan nga magpauli.
Sa statement nga gin-release sang Ukrainian foreign ministry, ginpanawagan man sini ang ila nga citizens nga indi na magbyahe padulong sa Russia.
Nagpaandam man ang Ukraine sa nagapakatig-a magbiya sa Russia nga limitado lang ang ila nga resources agud nga mabuligan ang mga Ukrainians kun halimbawa may matabo nga major diplomatic rupture. ##
