Ginpalawig pa sang Thailand sang isa ka bulan ang state of emergency sa ila pungsod agud makontrol ang paglapta sang coronavirus disease 2019 (COVID-19).
Anum na ka extension ang ginpatuman umpisa sang gin-isyu ang emergency decree sang Marso 25 sini nga tuig.
Sa idalom sang emergency decree, ginamanduan ang mga tawo nga magpabilin sa balay kag likawan ang dalagku nga pagtilipon apang may yara sa gihapon sang mga tawo nga nagapatigayon sang protesta batok sa gobyerno.
Ginadumilian ang international commercial passenger flights umpisa sang Abril 4, apang epektibo sa Hwebes subong nga semana, pahalugan na ang restrictions sa pagtravel sang mga foreigners agud makabulig sa gradual opening sang turismo sang pungsod.
Suno sa Ministry of Tourism and Sports, pahanugutan ang mga grupo sang foreign travelers kag mga negosyante nga makasulod sa Thailand kun may yara sila sang special visa.
Sa Oktubre 8, natalana nga magaabot sa Thailand ang grupo sang mga turista halin sa China, samtang sa Oktubre 26 kag Nobyembre 1, dugang nga grupo sang turista halina sa Europa kag China ang maga-abot.
Sa subong, ang Thailand ang nakarecord sang 3,559 ka COVID-19 cases kag 59 ka patay. #
(Photos are grabbed from Anadolu Agency)
