Nagpa-Bombo ang isa ka bulangero batok sa Local Government Unit (LGU) sang Dumangas, Iloilo bangud sa wala natigayon nga hearing subong nga adlaw kaangot sa ginapahayag violation nga nakumiter sang Stephanie Coliseum.
Sa interview sang Bombo Radyo kay Rey Domines, ang nagpa-Bombo, iya ginpahayag nga duha ka mga bayolasyon ang nakumiter sang Stephanie Coliseum.
Ini amo ang improper use of municipal tax kag failure to complaint with documental requirements.
Suno kay Domines, nagapanukot ang Stephanie Coliseum sang tax collection nga P350 apisar P200 lang dapat ini.
Ginbuyagyag man sang natungdan nga sugod sang Oktubre tubtob Disyembre 2024, wala sila ka remit sang municipal tax rason nga nagpasaka ini sang complaint sang Disyembre 27, 2024.
Gintuad man sini nga sa ila ginpasapolan, gin-ako sang Stephanie Coliseum nga sobra ang ila pagpanukot sang tax collection.
Ginpahayag man ni Domines nga naluoy lang siya sa mga manogbulang bangud sa tuman ka mahal nga pagpanukot sang tax.
Ginkadismaya man sini ang nangin tikang sang munisipyo sang Dumangas bangud apisar sang multiple violation sang Stephanie Coliseum, duha lamang ka semana ang suspension ang gindagdag batok sa ila.
Nahibaluan nga may committee meeting kontani kaina alas-11 sang aga nahanungod sa supplemental complaint kaangot man sa nasambit nga bulangan apang wala natigayon.
Bukas naman ang Bombo Radyo Iloilo sa pagpaathag sang Stephanie Coliseum kag sang LGU sang Dumangas.
