ILOILO CITY-Ginaluman nga makaabot buwas nga adlaw, Abril 28, ang ginabanta 188 ka seafarers nga kabahin sang first batch sang mga magapauli sa Iloilo.
Sa interview sang Bombo Radyo kay Maritime Industry Authority 6 Director Jose Venancio Vero, iya ginpahayag nga seafarers ang ginpaidalom sa 14 day quarantine sa Manila kag ginpaidalom sa rapid testing antes magsakay sa barko.
Suno kay Vero, ang mga positibo sa rapid test ang indi pagpahanugutan nga makapauli kag sa baylo magapaidalom liwat sa quarantine kag rapid test.
Ginpahayag ni Vero nga ang katungdanan sang Maritime Industry Authority sa pagpauli sang seafarers amo ang paghatag sang transportasyon padulong sa Iloilo.
Ang iban naman nga proseso suno kay Vero ang ginatugyan na sa Department of Tourism, Department of Health kag sa Bureau of Quarantine.
May kaangtanan diri, napadal-an na sang sulat ang City kag Provincial Government pinaagi sa e-mail sang nakaligad nga Biyernes, Abril 24.
