Nagapati ang isa ka Filipino architect kag urban planner nga mas makapamaayo sa pagpatukod sang imprastruktura kon ini ang ginapaidalom sa structural, electrical, architectural, mechanical-engineering, retrofitting, kag interior audit.
Sa interview sang Bombo Radyo kay Felino “Jun” Albano Palafox, Jr., Principal Architect-Urban Planner and Founder sang Palafox Associates, iya ginpahayag nga madugay na sang siya ang nagapanugyan sa mga building owners nga ang mga nasambit nga tikang ang bentaha ilabi na sa mahimo nga pagluntad sang linog.
Ginpaanggid man sini ang concrete steel bars sa isa ka paper clip nga kon masami nagakapilo ukon nagatiko, mahimo nga mangin mahuyang tubtob nga mautod.
Suno kay Palafox, ang structural audit ang makadala man sang mas mabaskog nga pundasyon sa mga hospital, evacuation centers, kag iban nga imprastruktura nga masami ginaigo sang natural nga kalamidad.
Gintuad man sini nga indi solusyon ang masami nga pagdeklarar sang ‘state of calamity’ ilabi na sa Pilipinas nga ginahimo lamang nga palaagyan para sa isa ka corruption.
Dugang ni Palafox, indi na dapat paghulaton ang state of calamity antes nga maghimo sang mga tikang agud nga mapalayo sa pagkarumpag sang mga imprastruktura.
Apisar sang pagdata sang korapsyon sa gobyerno sang Pilipinas, ginalantaw man sang natungdan nga lakip sa pagpatukod sang maayo nga building amo ang ‘good governance’, bangud diri man makit-an kon substandard bala ukon indi ang kagamitan nga gingamit sa isa ka infrastructure project.
