Estable na liwat ang suplay sang kuryente sa Tehran kag sa kaiping pa nga mga lugar sa Iran matapos ang pagpangbomba nga nag-igu sa ila nga power grids.
“Following last night’s enemy attack, the power grid in the provinces of Alborz and Tehran sustained damage and was affected,” suno sa deputy energy minister nga si Mostafa Rajabi-Mashhadi sa interview sa iya sa state television.
“The power network across Iran’s national electricity grid is stable; in Tehran and Alborz the problems have also been resolved,” dugang sini.
Nahibaluan nga na-report ang power interruption sa kapital nga Tehran matapos ang airstrike nga kabahin pa sang gyera sang US, Israel, kag Iran.
Suno sa ministry sandig sa ginbalhag sang state media, naigu sang shrapnel ang parte sang electricity grid sa Alborz rason nga nagligum-dulom sa madamo nga parte sang Tehran kag syudad sang Karaj.
Sa update sang Israel Defense Forces, ginsiling sini nga ginpuntariya nila ang “Iranian terror regime” sa Tehran.
Matandaan nga nakabuya anay sang paandam si US President Donald Trump nga atakehon sini ang Iranian power stations kun indi pagbuksan sang Tehran ang Strait of Hormuz. May ginhatag pa anay si Trump nga 48 ka oras nga ultimatum.
Wala nagpalingkang ang Iran kag nagbalos man sang paandam nga dalayon nila nga siraduhan ang Strait pananglitan tandugon ang ila power plants.
Sa latest nga pahayag ni Trump, nagapadayon na ang ila nga negosasyon kag nagdesisyon siya suno sa iya nga indi pag-atakehon ang energy infrastructures sang Iran sa sulod sang 10 ka adlaw.#
