Nagsugod na ang tagtaganay sang fuel subsidy coupon sa pila ka mga tricycle drivers sa siudad sang Iloilo kun sa diin nakabatun na ang mga drivers sa distrito sang Molo, Arevalo, kag Jaro, subong nga Marso 25, 2026.
Sa interview sang Bombo Radyo kay Joy Fantilaga-Gorzal, spokesperson ni Iloilo City Mayor Treñas, iya ginpahayag nga magapadayun pa tubtob bwas nga adlaw, Marso 26, ang paghatag sang coupon sa tricycle drivers sang La Paz, City Proper, kag Mandurriao.
Ginpakigbahin man sini nga magaumpisa na sa Byernes ang pagpatughong sang mga drivers sa ila designated stations nga makit-an sa ila nga mga coupon.
Dugang pa ni Gorzal nga nagpasalig si Mayor Treñas nga padayun man nga ginapreparahan ang paghatag sang city government sa pila ka mga Public Utility Vehicle (PUV) drivers nga posible man nga igahatag na sa masunod nga semana ukon sa pagkatapos sang semana santa.
Nahibaluan nga P500 nga balor sang petroleum products ang subsidiya nga ginhatag sang siudad para sa mga tricycle drivers bangud sa nagapadayun nga pagtaas sang presyo sang gatong sa Pilipinas.
