ILOILO CITY – Makabig nga illegal occupants sa Plaza Libertad ang talatapan sang Senior Citizen Consumer Cooperative.
Ini ang gin-anunsyo ni Iloilo City Mayor Jerry Treñas kadungan sang flag raising ceremony sa Iloilo City Hall.
Suno kay Treñas, ang tag-iya sang Plaza Libertad amo ang mga pumuluyo kag indi ang nasambit nga kooperatiba.
Subong nga semana kay Treñas, mahimo nga makuha na ang talatapan sang senior citizen sa nasambit nga plaza.
Samtang, naga-problema naman ang mga senior citizen kun sa diin sila masaylo matapos ang pahayag sang alkalde.
Sa interview sang Bombo Radyo kay Mr. Sofronio Paredes Jr., chairman sang Senior Citizen Consumer Cooperative, iya ginpahayag nga makapila na sila ka beses nga ginhatagan sang notice to leave apang may yara man sila sang gina-uyatan nga dukomento nga indi sila illegal occupants.
Sa pagpaathag ni Paredes, may resolusyon nga ginpasar ang Iloilo City Council sang 2015 sa diin ginhatagan sila sang prebelihiyo nga magtinir sa Plaza Libertad sa sulod sang 50 ka tuig.
Ginpahayag ni Paredes nga may yara sang Usufruct agreement nga ginpirmahan sang Iloilo City Government kag sang kooperatiba kag ini ang ginkumpirma man sang City Legal Officer.
Luyag man nila suno kay Paredes nga makigsapol sa alkalde agud nga makapaathag.
