ILOILO – Nagalaum si 1st District Board Member Marcelo Valentine Serag nga mapabalik na ang Pasungay sang mga karabaw sa San Joaquin, Iloilo sa masunod nga tuig.
Ini ang kadungan man sang iya pagpasar sang tatlo ka resolution nga igahatag sa opisina sang Department of Agriculture (DA) kag National Commission for Culture and the Arts (NCCA).
Sa interview sang Bombo Radyo kay Serag, iya ginpahayag nga sa sini nga resolution, ginahingyo sa DA nga i-revisit ang Implementing Rules and Regulations (IRR) sang Animal Welfare Act kag nagapangabay nga bisan temporaryo lang anay nga pahanugutan ang Pasungay sa ikatatlo nga semana sang Enero sa masunod nga tuig.
Suno kay Serag, indi makabig nga ‘animal cruelty’ ang Pasungay.
Iya ginpahayag nga may ara sang mas malala nga mga aktibidad sa iban nga lugar, kag sa pagkamatuod, ang Pasungay ang kabahin lang sang kultura sang mga pumuluyo sang San Joaquin.
Dugang pa ni Serag, ginahingyo man sa amo nga resolution sa NCCA nga i-deklarar ang aktibidad nga tradisyon sang taga-San Joaquin bangud ini ang ginkabig na nga ‘long-time treasured and established culture.’
Nahibaluan nga kapin 150 ka tuig na nga ginapatigayon ang Pasungay sa banwa sang San Joaquin, kag suno kay Serag, ini ang nag-umpisa pa sa World War II.
Kon matandaan, may yara sang reklamo nga nabaton ang banwa nagikan sa grupo nga Animal Kingdom Foundation nga nagasiling nga nagalapas ini sa Animal Welfare Act kag nagpahayag pa nga kasuhan ang mga opisyal kon indi ini pag-untaton.
Ini ang rason suno kay Serag kon ngaa nagdesisyon ang banwa nga ipaiway anay ang pagselebrar sang Pasungay sang 2019.
