Patay ang tatlo ka mga indibidwal kag siyam ang pilason matapos ang isa ka pag-atake sang isa ka lalaki nga may dala nga kutsilyo kag smoke grenade sa kabisera sang Taiwan.
Ginkilala ang suspek nga si Chang Wen, 27.
Suno sa report, ginbawian man sang kabuhi ang suspek matapos ini naglumpat halin sa ikaanom nga panalgan sang isa department store kag gindeklarar nga dead on arrival.
Base sa imbestigasyon, una nga naghaboy ang suspek sang smoke grenade malapit sa isa ka underground exit sang Taipei Main subway station.
Matapos sini, nagpadulong ang suspek sa isa ka sikat nga shopping district sa diin siya nangbuno sang pila ka mga tawo sa una kag ikaapat nga panalgan sang Eslite department store.
Suno kay mga otoridad, kadam-an sa mga biktima ang nakaangkon sang samad sa liog.
Nagguwa man sa imbestigasyon nga napaslawan si Chang nga mag-report sa iya reserve military training sang Nobyembre 2024 kag siya ang ginapangita bangud sa paglapas sa layi tuhoy sa mandatory military service.
Wala man sini na-update ang iya household registration, rason nga indi na niya mabaton ang abiso para sa iya military service, suno sa district prosecutors’ office.
