Taxi driver, pilason matapos ginhol-up sang duha ka menor de edad; duha ka mga suspetsado, nadakpan

ILOILO CITY–Pilason ang isa ka taxi driver matapos gin hold-up sang duha ka menor de edad sa Mandurriao, Iloilo City.
Sa interview sang Bombo Radyo kay Pepito Tamon, 56 anyos sang Brgy. Concepcion, City Proper, iya ginpahayag nga nagsakay ang mga suspetsado sa Megaworld Business Park kag nagpadul-ong sa Westwoods Subd., Brgy. Dungon C, Mandurriao, Iloilo City.
Santo sa panaysayon ni Tamon nga driver sang Melvin Taxi, nagpadul-ong sa Westwoods ang duha ka mga suspetsado sa balay sang ila tiya.
Pag-abot sa 35th street sang nasambit nga subdivision, hinali nga nagdeklarar sang hold-up ang duha kadungan sang pagtaya sang hinganiban.
Bangud sa kakulba, gintapi sang taxi driver ang kamot sang isa sa mga menor de edad nga suspetsado rason nga nagtabog ang patalum.
Gilayon nga nagpangayo sang bulig ang taxi driver sa security guard sang nasambit nga subdivision rason nga nadakpan ang duha ka menor de edad.
Santo sa pagpangusisa, may unod pa nga balunan kag school supplies ang bag sang duha ka suspetsado.
Ginpahayag sang biktima nga ini ang labing una nga kahigayunan nga nabiktima siya sang hold-up.