Napatas na sang San Miguel sa 1-1 ang serye sa 2024 PBA Governors’ Cup semifinals batok sa Barangay Ginebra matapos ang overtime sa Game 2 sa Araneta Coliseum sa Quezon City nga nagtakop sa skor nga 131-125.
Antes nakuha sang Beermen ang kadalag-an, naagaw pa sang Ginebra ang momentum sa fourth quarter sang napanas sini ang 11 puntos nga abanse paagi kay Justin Brownlee nga naka-15 puntos sa amo lamang nga frame.
Singko minutos ang nabilin sa oras sa fourth quarter sang nagpatas sa 97 ang skor sang duha ka team paagi sa tres ni Scottie Thompson.
Ang pinaka-interesante nga parte sang hampang amo ang nabilin nga 36 segundos sang 104-103 ang skor pabor sa San Miguel, apang naka-tres si Brownlee. Pila ka segundos ang nagligad, nagbalos sang dos si CJ Perez kag napatas liwat sa 106-106 ang scores.
Dos segundos na lang ang nabilin sa fourth quarter sang naka-tres pa liwat si Perez nga nagpahugyaw na sang tanan kag nagpasaka na sang skor sang Beermen sa 110 batok sa 108 sang Ginebra.
Nag-time out si Coach Tim Cone kag pagbalik sang hampang, didto na kag na-foul ni Terrence Romeo si Maverick Ahanmisi. Ang duha sini ka free throws amo ang nagpapatas sa skor sa 110 kag nagdiretso na sa overtime.
Sa extra period, ginpamatud-an naman sang 32-anyos nga former PBA scoring champion nga si Romeo nga masarangan sini mahakwat ang San Miguel. Siya ang Best Player of the Game matapos ang 26 puntos nga ginpaulan lakip ang 22 sa fourth kag extra period.
Walo ka sunod-sunod nga puntos ang ginbubo sini sa overtime nga nagpasaka sa lead sang San Miguel sa 120-117 sang dos minutos na lang ang nabilin sa extra time antes ang finishing touches nanday Marcio Lassiter, EJ Anosike kag Jericho Cruz.
Ang ila import nga si Anosike ang naka-35 points kag 9 rebounds; may 28 puntos si Perez; kag ang eight-time MVP nga si June Mar Fajardo ang may 23 points, 21 rebounds, kag six assists.
Apisar nalutos ang Ginebra, si Brownlee gihapon ang nagauyat sang game-high score nga 39 points.
Balantayan ang Game 3 sa Domingo, Oktubre 13, sa Dasmarinas, Cavite.
Scores (OT):
SAN MIGUEL 131 – Anosike 35, Perez 28, Romeo 26, Fajardo 23, Lassiter 12, Cruz 5, Tautuaa 2, Ross 0, Rosales 0, Trollano 0, Enciso 0, Manuel 0
GINEBRA 125 – Brownlee 39, J.Aguilar 29, Thompson 16, Ahanmisi 15, Holt 14, Abarrientos 4, Tenorio 3, Cu 2, Devance 2, Pinto 1, Pessumal 0, Adamos 0
QUARTERS: 22-24, 51-47, 85-76, 110-110, 131-125
(Photo: MARLO CUETO)
