Nagsugtanay na ang Thailand kag ang Cambodia sa pagpatuman sang ceasefire matapos ang lima ka adlaw nga away sa border nga nagresulta sang masobra 30 ka mga patay kag nagpatal-as sang linibo ka mga residente.
Santo sa anunsyo ni Malaysian Prime Minister Anwar Ibrahim, nag-umpisa ang “immediate and unconditional ceasefire” kaina sang tungang gab-i.
“This is a vital first step towards de-escalation and the restoration of peace and security,” pahayag sini sa press conference sa administrative capital nga Putrajaya. Sa amo nga anunsyo, nagtambong man sanday Thai acting Prime Minister Phumtham Wechayachai kag si Cambodian Prime Minister Hun Manet.
Suno kay Anwar, magakit-anay ang military commanders halin sa duha ka nasyon subong nga aga antes magsapol ang cross-border committee sang magtimbang nga bahin sa Cambodia sa Agusto 4.
Nahibaluan nga halos 300,000 ka mga pumuluyo halin sa border regions sang duha ka nasyon ang nag-evacuate bangud sang pagsinigabong sa area nga madugay na gina-awayan.
Ini ang pinakamakamamatay nga gamo sa magkaiping nga nasyon nga nag-ugat pa sang 2008-2011 bangud sa isyu sa teritoryo.
Sa pag-ibwal sang tensyon subong nga tuig, kadam-an sa casualties sa Thailand suno sa militar amo ang mga sibilyan nga naigo sang rockets. Sa Cambodia naman, 13 ang patay lakip ang walo ka mga sibilyan.#
