Liwat nag-init ang tension sa tunga sang Thailand kag Cambodia matapos maglunsyar ang Thailand sang air strikes sa may disputed border sini sa Cambodia.
Ini suno sa Thai military subong nga Lunes, Disyembre 8.
Ini man matapos maghabuyanay sang basol ang pareho nga pungsod sang paglapas sa ceasefire agreement nga gin-areglo ni US President Donald Trump.
Sa isa ka statement, ginkumpirmar sang Thailand military nga napatay ang isa ka suldado nga Thai kag pilason ang apat pa ka mga indibidwal sa pag-atake sang Cambodia sa duha ka lugar sa easternmost province sang Ubon Ratchathani.
Kaangot diri, gin-umpisahan na sang kampo sang Thai ang paggamit sang aircraft para maigo ang target sini nga military sang Camboadia sa nagkalain-lain nga lugar.
Sa kampo naman sang Cambodia, ginsiling sang defense ministry nga ang Thai military ang naglunsyar sang pag-atake sa kaagahon sa ila pwersa sa duha ka lokasyon kasunod sang ila adlaw nga mga probokasyon kag wala nagbalos ang ila mga tropa.
Matandaan nga nauna nga nag-init ang tension sa border dispute sang Hulyo nga nagpatay sa 48 ka tawo kag nagpa-displaced sa 300,000 ka mga indibidwal.
Nag-untat ang away sang matapos mangin epektibo ang ceasefire deal nga gin-areglo nanday Malaysian Prime Minister Anwar Ibrahim kag Trump, na lunsay nasaksihan ang pagpirma sa expanded peace agreement sa tunga sang duha ka pungsod sa Kuala Lumpur, Malaysia sang Oktubre.
