Nagsaka na sa 21 ang napatay sa apat ka states sa Estados Unidos sang Amerika bangud sa thunderstorms nga may dala pa nga mga buhawi.
Sa sini nga casualties, walo ang na-rekord sa Arkansas, pito sa Texas, apat sa Kentucky kag duha sa Oklahoma sandig sa latest tally sang state emergency authorities.
Sa Kentucky, nagdeklarar na si Governor Andy Beshear sang state of emergency samtang ginpahayag naman sang National Weather Service nga may ginpaguwa nga severe thunderstorm watch sa mga parte sang Georgia kag South Carolina tubtub Lunes sang hapon sa amo nga mga lugar.
Sa Texas naman, ginkumpirma ni Governor Greg Abbott nga sa pito nga napatay, nalakip ang duha ka tuig kag lima ka tuig nga mga bata samtang malapit 100 naman ang pilason bangud sa buhawi nga naglaslas sa mga komunidad sa north Texas malapit sa border sa Oklahoma.
Sa Arkansas, lakip sa napatay amo ang residente nga may chronic obstructive pulmonary disease kag nadulaan sang oxygen sang nautod ang suplay sang kuryente.
Sa latest data sang PowerOutage.US tracking website, ginatos ka libo nga mga Americans ang naka-eksperyensya sang power outages kun sa diin pinakadamo sa Kentucky nga may 180,000 outages.
Nagpaandam man ang National Weather Service nga lauman ang malain pa nga tyempo sa Ohio kag Tennessee kun sa diin mahimo makaguba sang balay ang kabaskugonsang hangin kag posible pa magtuga sang flash floods ang mga mabaskog nga pag-ulan.
Naga-preparar man ang US sa ginasiling sang government forecasters nga potensyal nga “extraordinary” 2024 Atlantic hurricane season nga magasugod sa Hunyo 1.
