Ginhangkat ni Atty. Ferdinand Topacio si Presidente Ferdinand Marcos Jr. nga pangalanan na ang tanan nga may kahilabtanan sa anomalya sa flood control scandal.
Ginhimo ini ni Topacio sa isa ka forum nga gin-organisar sang Partido Demokratiko Pilipino (PDP) ang political party sa diin siya mismo ang nagaserbe bilang deputy spokesperson.
Suno kay Topacio, kun permi nalang nga ginapadayaw ni Marcos nga siya nag-umpisa sa imbestigasyon kag siya ang nagpagguwa sang pangalan sang mga dalagkuan nga contractor, dapat siya man ang magbuyagyag sang pangalan sang mga nagserbe nga mastermind.
Pahayag pa niya, Setyembre pa sang ginporma ni Marcos ang Independent Commission for Infrastructure (ICI), apang nagapadayon nga mahinay ang lakat sang imbestigasyon kaupod na ang pagpa-priso sa mga may kahilabtanan.
Nagapati ang abogado nga nahibaluan sang presidente kun sin-o ang yara sa likod sang lapnagon nga korapsyon.
Ginakwestyon man ni Topacio ang Presidente, kun ano ang nagapugong sa iya agud ibuyagyag ang iya mga nahibaluan.
Ginpahayag man sini nga lip-service lamang ang Nakita sang publiko halin kay President Marcos, kag nagapadayon nga nagahipos sa pihak sang nabuyagyag nga lapnagon nga korapsyon.
