Posible nga suspendihon ang traffic enforcer nga nagpahanugut sa isa ka sexy girl nga magtabuk sa ‘no jaywalking area’ sa Diversion road, Mandurriao, Iloilo City.
Sa interview sang Bombo Radyo kay Mr. Jeck Conlu, pinuno sang Iloilo City Public Safety and Transportation Management Office (PSTMO), iya ginpahayag nga yara na sa disciplinary committe ang kaso sang enforcer kag sila na ang magapagwa sang desisyon.
Suno kay Conlu, base sa paathag sang enforcer, wala sini gintugutan nga magtabok ang babayi apang nagpamilit ini.
Wala naman siya sang nahimo suno sa iya bangud nahuya ini kag na “star struck” sa kagwapa kag ka-sexy sang babayi.
Apisar sang iya nga paathag, makita sa gihapon suno kay Conlu ang iya kakulangan nga tungdan ang iya nga trabaho bangud wala na ini sang ginhimo nga akto agud nga punggan ang pagtabok sang babayi.
Posible nga maglab-ot sa tatlo ka adlaw ang suspension sang traffic enforcer.
