ILOILO CITY –Natapos na ang tatlo ka adlaw nga pagpaidalom sa training sa mga katapo sang Public Safety and Transportation Management Office sang Iloilo City Government.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga 100 ka mga katapo sang iya talatapan ang ginhanas sang mga traffic enforcers sang Metropolitan Manila Development Authority-traffic Academy Division nga nagsugod sang Martes, Nobyembre 26.
Suno kay Conlu, ginhanas kag ginpasangkad pa ang ihibalo sang mga traffic enforcers sa syudad natuhoy sa traffic rules kag regulations, mga traffic enforcement actions, mga estratehiya sa pag- isyu sang tiket sa mga violators, mga technique sa pag- direct kag pag-kontrol sang trapiko, paano mag-assist sa mga aksidente sa dalanon kag iban pa.
Ginpahayag ni Conlu nga ang training ang kabahin sang pagpalevel-up sang ikasarang kag imahe sang mga traffic enforcers sa syudad sang Iloilo.
Ginpahayag naman ni Conlu nga desidido si Mayor Jerry Treñas nga i-professionalize ang mga traffic enforcers sa syudad.
Suno kay Conlu, nag-set na sila sang mga requirements para sa mga luyag mangin katapo sang Public Safety and Transportation Management Office.
Ginpahayag ni Conlu nga sa mga aplikante, kinahanglan nga may yatra sang 72 units sa kolehiyo apang mangin prayoridad ang mga graduate sa kurso nga Criminology; indi maglapaw sa 30 ang edad.
May yara man sang eksaminasyon kag interview agud masala sang husto ang masunod nga mangin katapo sang talatapan.
Suno pa kay Conlu, kinahanglan nga i-level up ang imahe sang mga traffic aides bilang isa ka maayo nga trabaho nga may insakto nga benepisyo.
May kaangtanan naman sa pagpatukod sang tricycle franchising and regulatory board sa syudad, iya ginpahayag nga bentaha ini agud nga may yara na sang magadumala kag magaplastar sang mga pagsulundan sa operasyon sang mga tricycle.
Magluwas sa pagpatukod sang tricycle franchising and regulatory board, target man sang syudad nga magtukod sang transportation board para sa tanan nga transportasyon sa syudad sang Iloilo.
