Patigayunon subong nga adlaw, Marso 23, ang transport holiday ukon ang untat byahe sang mga transport cooperatives diri sa syudad sang Iloilo.
Ini ang kasunod sang nagatimbuok nga presyo sang gatong, apang ginapahayag nga kulang ukon wala gid sang suporta sang gobyerno nga nahatag sa sector sang transportasyon.
Sa interview sang Bombo Radyo kay Halley Alcarde, Vice President sang Western Visayas Alliance of Transport Cooperatives and Corporations, Inc. (WVATCCI), iya ginpahayag nga samtang nagasaka ang presyo sang mga produktong petrolyo, daw indi man halos makabulig ang ginpasalig sang gobyerno nga ihatag nga P5,000 fuel subsidy.
Suno sa iya, makapiyan-piyan na kun tani sa mga drivers ang dugang nga dos pesos, apang ginbawi pa ni President Ferdinand Marcos, Jr.
Ginpakigbahin pa ni Alcarde nga indi lang ini ang nangin pasalig sang gobyerno, bangud sang nagligad nga Nobyembre, nakatalana nga magahatag man kun tani ang Department of Transportation (DOTr) kag Land Transportation Franchising and Regulatory Board (LTFRB) sang equity subsidy, apang wala man ini magtupa tubtob subong.
Dugang pa niya, daw indi na sila halos makatibawas sa paghatag sang sweldo sa ila nga mga drivers kag iban pa nga galastuson bangud wala man sang epektibo nga solusyon ang ginapatuman sa pungsod.
‘BISAN I-CANCEL ANG AMON PRANGKISA’
Talalupangdon nga ini nga protesta nga una nga himuon sang transport cooperatives sa syudad sang Iloilo halin sang nagsuporta sila sa Public Utility Vehicle (PUV) Modernization Program.
Suno kay Mr. Raymundo “Boyet” Parcon, chairman sang Western Visayas Transport Cooperative (WVTC), gintawtawan lang sila sang pasalig nga may subsidiya, apang tubtub subong, bisan tatlo ka semana na ang gyera sa Middle East, wala gihapon sang ayuda nga nabaton ang sektor sang transportasyon halin sa gobyerno.
“Ang number one nga ginapangayo naton amo ni ang pagpasaka sang plete. Kuntani pasakaan ini sang seven pesos [provisional fare increase]. Temporary lang ini. Kun mag-normal na, ibalik man naton sa normal ang pletehan. Sa subong, importante lang sa tanan nga may suporta lang o kapital o pang-sapin-sapin man sa amon nga para man sa pagserbisyo sa mga pumuluyo kag commuters para nga maka-sustain man kami sa sige-sige nga saka sang diesel,” suno kay Parcon.
Nakahibalo man ini nga madamo ang maapektuhan kun indi sila magbyahe, apang nagapanindugan siya nga paagi ini agud nga pamatian sila sang gobyerno.
“[Kami sa WVTC], nagapamyerdehan kami sang P100,000 a day. Diin kami makuha sina kun indi kami mag-pressure sa gobyerno nga dapat pamatian kami? Kun transport kami, once mag-untat kami byahe, kadamo sang maapektuhan nga mga pasahero,” pahayag pa ni Parcon.
Nagdugang man ini nga preparado man sila sa posible nga show cause order ukon kun ano ang mangin akto sang gobyerno sa ila himuon nga transport holiday.
“Ini nga kawsa indi lang ni basta-basta. Gutom na ang mga operators kag drivers subong. Updan namon ini nga kawsa subong, wala na kami subong nakulbaan bisan i-cancel ukon i-revoke ang amon prangkisa,” dugang niya.#
