Ginplastar ni Iloilo City Mayor Jerry Trenas ang long-term solutions agud nga indi na maglala pa ukon masulit ang outbreak sang food and water borne diseases sa syudad sang Iloilo kaangay sang gina-eksperyensya subong nga pagsaka sang kaso sa Acute gastroenteritis kag cholera.
Sa interview sang Bombo Radyo sa alkalde, yari ang ginpahayag nga mga plano nga kinahanglanon.
Una, pagbutang sang linya sang tubo sa mga komunidad:
Suno sa alkalde, ginatrabaho na ini sang Metro Pacific Iloilo Water (MPIW) kag Metro Iloilo Water District sa Iloilo City.
Ginpahayag nga may ginsulod ang joint venture agreement agud ma-address ini nga problema sa syudad.
Ikaduha, pagpatukod sang Communal toilets:
Ginatun-an na suno sa alkalde ang pagpahamtang sang communal toilets sa pila ka selected ares sa Iloilo City.
Ginapahayag nga nagalibot na ang mga personnel gikan sa City Engineer’s Office agud makapangita sang husto nga lugar.
Lakip sa inisyal nga na-mensyonar nga mga barangay amo ang Rizal Estanzuela, Tanza Baybay, kag Maria Clara sa Iloilo City Proper:
Ikatatlo, pagpangdakop sa mga ido:
Isa man sa ginalantaw nga rason sang paglapta sang infection amo ang pagsimpon sang higko sang tawo kag sang ido nga amo ang nagasulod sa mga bubon.
Pabaskugon pa suno sa alkalde ang kampanya sa layaw nga mga ido.
