Ginapaabot sang Philippine Atmospheric, Geophysical and Astronomical Services Administration (PAGASA) nga makasulod sa Philippine Area of Responsibility (PAR) subong nga kaagahon ang tropical storm nga may international name nga Haishen.
Kun yara na sa PAR, pagasuguran ini tawgon sa lokal nga ngalan nga Josie.
Ulihi nga nakit-an ang sentro sang bagyo sa 1,090 kilometro sa nasidlangan sang Eastern Visayas nga may dala nga kabaskugon sang hangin ngfa 65 kilometro kada oras kag pagmadlos nga nagalab-ot sa 80 kilometro kada oras.
Suno sa PAGASA, nagapadulong sa northwest ang tropical storm kag wala ginapaabot nga mag-landfall sa Pilipinas.
Sa pagsulod sini sa PAR, magapadulong ini sa naaminhan nga parte antes magguwa sa area of responsibility sa Miyerkules.
Samtang yara sa PAR, ginapaabot man nga magaluya ini bangud sang indi paborable nga kondisyon sa palibot.
Dugang pa sang PAGASA, posible nga wala ini sang direkta nga epekto sa panahon kag kahimtangan sang kadagatan sa masunod nga mga adlaw.
Samtang, nagsiling man ang weather bureau nga nagluya na ang habagat kag indi na posible nga magdala sang mabaskog nga ulan sa nakatundan nga bahin sang Northern kag Central Luzon, apang posible gihapon ang lapta-lapta nga pag-ulan kag pagpangilat sa pila ka bahin sang Ilocos Region, Benguet, Zambales, Bataan kag Tarlac.
Sa pihak nga bahin, nagsaka na sa 20 ang napatay bangud sa gintingob nga epekto sang Bagyo Inday kag habagat samtang 16 pa ka persona ang padayon nga ginapangita.
Suno sa Office of Civil Defense, masobra sa 654,000 ka mga indibidwal ang naapektuhan sa bug-os nga pungsod.
Naglab-ot naman sa P3.18 bilyon ang inisyal nga balor sang halit sa imprastruktura, samtang P43.38 milyon na ang bulig nga nahatag sang gobyerno sa mga apektado nga komunidad.
