Nagpaathag si United States President Donald Trump nga ginmandu sini ang pag-atake sa Iran agud nga balabagan ang nuclear development kag ballistic missile program nga madasig nga ginatukod sang Tehran.
“This was our last best chance to strike … and eliminate the intolerable threats posed by this sick and sinister regime,” kabahin sang pahayag sini samtang yara sa White House East Room.
Suno sa presidente, ginalantaw sini nga magalawig sang apat tubtub lima ka semana ang operasyon sang Estados Unidos sang Amerika, apang posible nga mas magdugay pa.
Ginapanginwala sang Iran nga nagahimo ini sang nuclear weapon, apang suno naman kay Trump, isa ka daku nga pamahog sa Middle East kag sa mga pumuluyo sang Amerika ang Iranian regime nga may long-range missiles kag nuclear weapons.
“Today, the United States military continues to carry out large-scale, combat operations in Iran to eliminate the grave threats posed to America by this terrible, terrorist regime,” dugang pa sini.
Ginpadayaw man sang Presidente nga 10 ka Iranian warships ang ginlugdang sang US.
Ginpanindugan sini nga papason man nila ang navy sang Iran agud mauntat ini sa pag-angkon sang nuclear weapon.
Ang isa pa ka tinutuyo suno sa iya amo ang madugay na nga misyon sang US nga punggan ang Iran nga magsuporta sa iban pa nga militante nga grupo sa Middle East.
Sabado sang gin-umpisahan sang US kag Israel ang operasyon sa Iran nga nagpatay sa ila Supreme Leader kag iban pa nga senior officials.
