Ginlaslasan ni US President Donald Trump ang mga pungsod sa Europa nga nagapakatig-a nga mag-intra sa gyera sang Estados Unidos sang Amerika batok sa Iran.
Espesyal nga namensyonar ni Trump ang United Kingdom sa iya post sa Truth Social.
May yara si Trump sang duha ka mga suhestyon sa mga indi mag-intra agud maguba ang Iran. Una suno sa iya, mabakal na lang sila sa Estados Unidos bangud madamo man sila sang langis. Ikaduha suno pa kay Trump, mangisog na lang ini nga mga pungsod, magkadto sa Strait of Hormuz, kag magmato-mato kuha sang langis.
“All of those countries that can’t get jet fuel because of the Strait of Hormuz, like the United Kingdom, which refused to get involved in the decapitation of Iran, I have a suggestion for you: Number 1, buy from the U.S., we have plenty, and Number 2, build up some delayed courage, go to the Strait, and just TAKE IT,” post sang US leader.
Suno pa kay Trump, dapat nga magtuon na lang sila sa pagbato para sa ila kaugalingon, bangud indi na magbulig sa ila ang Estados Unidos sang Amerika, bangud wala man gani sila ginabuligan.
“You’ll have to start learning how to fight for yourself, the U.S.A. won’t be there to help you anymore, just like you weren’t there for us. Iran has been, essentially, decimated. The hard part is done. Go get your own oil,” dugang niya.
Matandaan nga antes sini, nasapubliko nga ginbalabagan sang French government ang Israeli planes nga magpalupad sang ila weapons sa airspace sang France. Wala man naghatag sang permiso ang Italya sa US bombers nga makahugpa sa Sicily.
Una naman nga nagbalibad ang Spain nga magamit sang US ang ila bases kag airspace para sa gyera.
Sa pihak nga bahin, nagsugot naman ang UK nga gamiton sang US ang British bases kun mag-atake sila sa Iranian sites nga amo ang naga-puntariya sang Strait of Hormuz. Apisar sini, indi kuntento si Trump sa amo nga tikang.#
