Ginhatag sang Department of Agriculture (DA) sa isa ka Ilonggo farmer ang mataas nga pagkilala bilang Outstanding High Value Crops Farmer Achiever sa vegetable category sa ika-51 nga Gawad Saka National Awarding Ceremony.
Ini amo si Engr. Ed Roderick V. Cañuto sang Badiangan, Iloilo nga nagpangibabaw bangud sang daku kag pinasahi sini nga kontribusyon sa agrikultura sa pungsod.
Sa interview sang Bombo Radyo kay Cañuto, iya ginpahayag nga 13 ka tuig na siya sa pagpanguma nga ginsuguran sini paagi sa mapisan nga pagtuon, pagtambong sa mga training kag seminar, kag pag-adoptar sang maayo nga mga practices nga iya nakit-an.
Suno kay Cañuto, isa siya ka software engineer, apang bangud sa impluwensya kag pagtudlo sang iya amay nga ginakabig sini nga idolo, na-engganyo man siya nga magsulod sa pagpanguma kag negosyo tubtub nga ginpalangga kag ginpabugal na sini ang amo nga trabaho.
Pahayag sini, sa masobra isa ka dekada na sini sa agrikultura, isa sa iya ginahimo ang pagpakigbahin sang iya ihibalo natuhoy sa moderno nga teknolohiya kag iban pa. Ini bangud isa man siya ka educator nga nagatudlo sa isa ka unibersidad sa Iloilo kun sa diin tuyo sini nga makatudlo sa mga mangunguma kag sa mga luyag mangin mangunguma.
Nahibaluan nga ang Gawad Saka amo ang pinakadaku kag pinaka-prestihiyoso nga awards program sang DA nga nagapasidungog sa outstanding nga mga indibidwal kag organisasyon sa ila pinasahi nga mga kontribusyon sa Philippine agriculture and fisheries.
Subong nga tuig, ginpatigayon ini sa Philippine International Convention Center (PICC) sa Pasay City kun sa diin may national winners sa pito ka mga kategorya lakip na ang crops, livestock, fisheries, institutions, extension, youth, kag cross-cutting initiatives. Ang awardees nagalakip sang mga mangunguma, manugpangisda, agripreneurs, agricultural extension workers, organizations, kag institutions nga may dedikasyon kag inobasyon nga nagabulig sa agri-fisheries sector.
