Patay ang 33-anyos nga Ukrainian actor nga nagsulod sa Territorial Defence Force sang iya pungsod kasunod sang Russian invasion.
Si Pasha Lee, ukon kilala man nga si Pavlo Li kag Pasha Li, ang nabun-ag sa Crimea kag ginapahayag nga nagtaliwan sang Marso 6.
Ginapahayag nga lakip ini sa nabombahan sa Irpin, isa ka lugar sa northwest sang capital nga Kyiv kag isa man ka lugar kun sa diin masami nagaluntad ang inaway batok sa pwersa sang Russia.
Ang iya kamatayon ang ginkumpirma man sang National Union of Journalists sa Ukraine kag sang Odessa International Film Festival.
Lakip si Lee sa 2016 action-comedy nga Selfie Party, 2017 nga sports action-drama nga The Fight Rules kag 2019 comedy nga Meeting of Classmates.
Yara man ang iya tingog sa dubbed Ukrainian versions sang films nga The Lion King kag The Hobbit, kag nangin host man sang local DOM TV channel.
