USA – Ginakulang ang supply sang COVID-19 test kits sa Vanura Home Health nga isa ka home health care provider sa Estados Unidos.
Sa Good Morning Philippines program, ginpahayag ni Fiona Castillo, Registered Nurse kag Director sang Patient Care sang Vanura Home Health Services Inc., nga US-based company ang supplier sang COVID-19 test kits nga ila ginagamit.
Suno kay Castillo, nagalab-ot sa 300 ka pasyente ang gina-atipan sang medical experts sang Vanura Home Health kun sa diin isa na ka pasyente ang nagpositibo sa Coronavirus Disease 2019 (COVID-19).
Ginpahayag ni Castillo nga ang iban sa mga pasyente ang ginapili na lang nga magpaidalom sa home health care samtang ang iban naman ang may referral gikan sa doktor.
Kasubong sa hospital, may yara man sang protocol nga ginasunod ang mga eksperto sang Vanura Home Health sa pagtatap sa mga pasyente ilabi na ang may yara sang COVID-19.
Bangud sa nagadamo nga numero sang pasyente, ginpahayag sang natungdan nga prayoridad sa pagpaidalom sa COVID-19 test amo ang mga nakitaan sang sintomas.
Madali nga maglapta ang virus kun wala ginasunod ang proper hygeine ukon katinlo.
Sa pagpaathag ni Amabel De Leon, Registered Nurse kag Founder sang Vanura Home Health kag Edzen Solutions, ang virus ang mahimo nga magtinir sa hangin sa sulod sang pila ka oras kag sa tion nga ini ang magtupa sa bayo ukon sa gamit, mahimo ini nga magtinir sang pila ka adlaw.
Suno kay De Leon, ang masami nga pagpanghugas sang kamot ang pinaka simple nga himuon agud nga makalikaw sa balati-an.
Ginpahayag ni De Leon nga indi lamang ang mga tigulang ang madali nga dapu-an sang virus kundi lakip man ang mga lamharon.
