Kasunod sang kamatayon ni Pope Francis, awtomatiko nga nabutang sa kamot sang “Camerlengo” nga si Cardinal Kevin Farrell ang pagdumala sa Vatican tubtub nga wala pa sang may ma-eleher nga bag-o nga Santo Papa.
Gin-appoint siya sang 88-anyos nga Pope, kag siya man ang magapanguna sa meetings agud nga matumod ang petsa sang lubong sang Holy Father. Siya man ang maga-supervise sa iban nga organizational tasks.
Nabun-ag si Farell sa Ireland, apang isa man siya ka naturalized American citizen.
Isa siya sa pinaka-ginasaligan sang Pope nga collaborators. Sang 2016, sang siya pa ang Bishop sang Dallas, Texas, gin-appoint siya nga mangin lider sang family life sa Vatican nga amo ang naghimo sa iya nga Cardinal, kag tatlo ka tuig ang nakaligad, ginpili siya para sa importante nga position sang “camerlengo.”
Lunes sang gab-i sa Vatican, si Cardinal Farrell man kaupod si Cardinal Pietro Parolin kag Archbishop Edgar Peña Parra ang nagsirado sang papal apartment sa Apostolic Palace kag ang puwertahan sa apartment sang Casa Santa Marta kun sa diin nagpuyo ang Pope.
Suno sa Vatican, ginpatigayon naman ang seremonya sa certification of death kag pagbutang sang lungon sa chapel sang Casa Santa Marta kun sa diin ginbasa ang deklarasyon sang kamatayon sang Santo Papa.
Matandaan nga si Cardinal Farrell man kahapon sang hapon (oras sa Pilipinas) ang nag-anunsyo sang kamatayon ni Pope Francis. Base sa death certificate, napatay ang Pope bangud sa stroke kag heart failure isa ka adlaw matapos ang public appearance sini sa Easter Sunday.
