Ginpahibalo na sang United States State Department ang US Congress may kaangtanan sa tuyo nga mag-provide sang $100 million ukon P5.9 billion sa foreign military financing sa Pilipinas matapos nga ginkanselar sang pungsod ang deal sini sa Russia sa pagbakal sang choppers.
Suno kay US Ambassador MaryKay Carlson, mahimo magamit sang Philippine defense department ini nga pondo sa modernisasyon ukon mahimo man magamit bilang bawi sa kuwarta nga ginhatag sa Moscow bilang down payment.
Ginpasalamatan man ni Carlson ang Pilipinas sa desisyon nga ikanselar ang deal sa Russia kasunod sang ginhimo sini nga invasion sa Ukraine.
Agusto sang gin-anunsyo sang Department of National Defense nga ikanselar sini ang procurement sang 16 ka Mi-17 helicopters balor P12.797 billion halin sa Moscow, apisar nga may P1.9-billion na nga down payment sang November 2021.
Pananglitan gindayon sang Pilipinas ang deal sini sa Russia, posible nga mag-agom ini sang sanctions ukon silot sa Amerika.
Mahimo ini patigayunon sang Estados Unidos sa idalom sang Countering America’s Adversaries Through Sanctions Act apisar nga may military alliance pa ini kag ang Pilipinas. ##
