Duha ang patay kag isa ang pilason matapos gin-ambush ang isa ka van sa Barangay Aglalana, Passi City, Iloilo.
Ang napatay amo si Jennylyn Juliano Griño, 32, residente sang Tanza Esperanza, Iloilo City Proper.
Patay man ang isa ka lalaki nga ginapahayag may apelyido nga Fuentes.
Pilason naman si Kenneth Campos Dorado, tumandok sang Bahit, Panit-an, Capiz.
Ang driver sang van nga si Jinnefer Opina, residente sang Ivisan, Capiz ang wala man sang pilas nga naangkon.
Sa interview sang Bombo Radyo kay Pol. Lt. Dennis Pamonag, hepe sang Passi City Police Station, iya ginpahayag nga indi personal nga kilala sang driver ang mga biktima bangud ginapahayag gin-arkilahan lang sang mga biktima ang van nga ginamaneho ni Opina halin sa Barangay Tanza Esperanza, Iloilo City Proper.
Sandig sa panaysayon sang driver, nakapundo pa sila agud magkaon sa karinderya sa Poblacion apang sang nag-resume na ang byahe, pag-abot sa highway sa Aglalana, nagdikit sa van sang mga biktima ang Toyota Vios kag didto na ginhimo ang krimen.
Duha ang ginapahayag gunmen nga sakay sang Toyota Vios.
Naglapta sa crime scene ang 20 ka empty shells sang ginapahayag M16 rifle kag 9mm pistol.
Padayon pa subong ang hot pursuit operation agud nga madakpan ang mga suspek nga nagpalagyo padulong sa Capiz.
