Temporaryo nga gin-dumilian sang Cybercrime Investigation and Coordinating Center (CICC) ang online gaming app nga “GoreBox”.
Ini sunod sa shooting incident sa San Jose National High School sa Tacloban City sang Lunes sang aga, Hunyo 22, kun sa diin duha ka Grade 9 students ang suspek, apat ka estudyante ang patay, kag masobra 20 ang napilasan.
Base sa Police Regional Office 8 (PRO-8), naadik sa amo nga online gaming app ang isa sa mga suspek sa pagpangluthang.
Bangud sini, temporaryo nga i-ban ang GoreBox suno kay CICC Center Usec. Aboy Paraiso bilang precautionary measure samtang ginahulat ang imbestigasyon.
Indi mahimo mabalewala suno sa iya ang posible nga impluwensya halin sa online nga mahimo nakaresulta sa sini nga insidente.
Suno kay Paraiso, ang temporaryo nga pagpauntat sang operasyon sang online gaming app magahatag kahigayunan sa mga awtoridad nga maghimo sang tul-id nga pag-usisa agud matukiban kun may koneksyon ini sa ginhimo sang suspek.
Suno naman sa Deparment of Justice, ginalantaw nila ang posibilidad nga nag-ugat ang pagpangluthang sa pattern sang Nihilistic Violent Extremism (NVE) kag indi lamang ini simple nga kaso sang bullying.
Suno kay DOJ spokesperson Polo Martinez, kinahanglan ang mas madalom nga analysis sa behavioral trends.
Sandig sa Federal Bureau of Investigation (FBI), ang NVE ang nagatumod sa factors nga naga-engganyo sa indibidwal nga mag-commit sang krimen.
Matandaan nga lunsay Grade 9 students nga naga-edad sang 14 kag 15-anyos ang mga suspek sa amo nga insidente. Lunsay na sila yara sa kustodiya sang awtoridad.
Nahibaluan nga ang Gorebox ang gin-develop sang German independent game developer nga si Felix Filip sang F2 Games. Available ini sa Windows, Linux, kag Android devices. Gin-release ang steam version sini sang Hulyo 22, 2023. Kun sa Android, libre ang pag-download sini nga app kag ad-supported lamang.
Nahatagan ini sang International Age Rating Coalition sang R18+ rating bangud sa depictions sang extreme violence kaangay sang pagpakita sang dugo kag dismemberment, apang kun yara sa Android version, may yara sang option agud nga ma-tone down ang violence nga makit-an.#
 ang online gaming app nga “GoreBox”.){kind=link}