Indi na magtambong si Vice President Sara Duterte sa November 20 House good government and public accountability panel inquiry kaangot sa paggamit sang budget sang iya talatapan kag sang Department of Education (DepEd).
Ginpahayag ni Duterte nga usik lang ini sang iya oras kag sa baylo magasumiter siya sang affidavit agud magpaathag sang iya kaugalingon.
Nagpabutyag man ang natungdan nga indi niya maintindihan kon ngaa ginaimbitar siya apisar nga wala sang may ginahatag nga questions ang House panel.
Ginatumod sang Bise Presidente ang iya pagtambong sa House panel inquiry sa diin nagpamalibad ini nga magsumpa antes maghatag sang iya testimonya.
Sa pagpamalibad sang Bise Presidente nga magsumpa, ang mga katapo sang panel sang Kamara nagpadayon sa pagpamangkot sa iban pa nga mga resource persons nga nagtambong nga nagsumpa.
Ang imbitasyon naman para sa Nobyembre 20 nga imbestigasyon ginserbe sang Miyerkules sa Bise Presidente sang nagpakita siya sa tion sang House QuadComm probe sa drug war killings sa tion sang administrasyon sang iya amay, si anay President Rodrigo Duterte.
Ang House good government kag public accountability panel una na nga nagsambit sang apat ka mga opisyales sang Office of the Vice President sa ila kapaslawan nga magpakita sa imbestigasyon sang kongreso.
Una naman nga ginbuyagyag sang House panel probe ang mga resibo sa paggamit sang confidential funds sa idalom ni VP Sara Duterte, nga may nakasaad nga sala nga mga petsa, wala ginhingadlan nga mga pirma, kag iban pa nga mga inconsistencies.
