𝗠𝗔𝗡𝗜𝗟𝗔 — Wala na karon sang deskripsyon si Vice President Sara Duterte sa iya relasyon kay Presidente Ferdinand “Bongbong” Marcos Jr., nga kaupod niya sa pagpadalagan kag nagdaug sa Eleksyon 2022 bilang kabahin sang UniTeam ticket.
Ginpahayag sang anay secretary of education nga wala pa siya naka-istorya kay Marcos matapos nga nag-resign sa Gabinete.
Kon balikan, ginmulay sang Bise Presidente sang Miyerkules ang gobyerno sang Pilipinas, lakip na ang Kamara de Representantes, bangud sa ginapahayag nga kakulang sini sang solusyon sa pagsabat sa mga isyu sa ikaayong lawas, seguridad, imprastraktura, kag pagpanghilabot sangn foreign interference.
Sa malaba nga pahayag nga gin-address sa Muslim community, ginpahayag ni Duterte nga ang pungsod ginapangunahan sang mga opisyales nga indi loyal sa ila ginsumpaan nga katungdanan.
Gin-ako man ni Duterte nga nakibot siya sa resulta sang OCTA Research Survey nga nagapakita nga nagnubo na ang mga pro-Duterte nga mga Pilipino.
Ginkwestyon man sini ang paggasto sa survey agud magpamangkot lamang kon pro-Marcos ukon pro-Duterte, kon sa diin, ginmitlang sini nga mas makapamaayo kon ‘pro-Pilipinas’ ang ginbutang.
Ginakabig naman ni Duterte nga ang amo nga tikang ang isa ka “perpetuation in power” bilang “motibo” agud mapalawig ang termino.
Dugang pa sang bise-presidente, nga ang tanan nila nga ginahimo amo ang pagpamulitika gamit ang gahum sang gobyerno.
