Gintawag ni Iloilo Fourth District Representative Dr. Ferjenel Biron nga “wala sang basehan” kag “kaladlawan” ang alegasyon nga nadula sa idalom sang administrasyon sang iya anak ang masobra P63-million nga income sharing sa tunga sang local government kag Philippine Ports Authority (PPA) halin sa Dumangas port.
Sa interview sang Bombo Radyo kay Biron, iya gintawag nga “wala sang kredibilidad” kag “puerte ka alam nga tulisan nga pulis” ang naghaboy sini nga akusasyon batok sa iya anak nga si Mayor Braeden John BJ Biron.
Wala ini sang ginmensyonar nga pangalan apang matandaan nga sini nga Agusto sang gin-raise ni Ret. Police Major Charlie Sustento Jr. ang isyu nga nadula ang minilyon ka pesos nga naangot sa Dumangas port development.
Suno kay Rep. Biron, “in place” sa gihapon ang kuwarta sang banwa sang Dumangas.
Antes ang sabat sang amay nga Biron, nagpaguwa na sang official statement si Mayor Biron nga wala sang kuwarta nga nadula bangud sa idalom sang iya liderato, istrikto nga nagasunod ang banwa sa prinsipyo sang transparency kag accountability kag bukas gid ang financial records sang local government para sa public review.
Ginpaathag man anay sang alkalde nga ang share sa tunga sang PPA kag Dumangas ang na-outline sa Memorandum of Agreement (MOA) nga pending pa subong sa PPA para sa pirma kag implementasyon.
Bilang pag-echo sa statement sang anak, ginsiling ni Rep. Biron nga wala sa LGU kundi yara ang bola sa PPA bangud nga yara sa ila ang MOA nga kinahanglan.
Pahayag ni Rep. Biron, indi sila kawatan bangud nagsulod siya sa pulitika nga malimpyo ang kamot, kag magaguwa nga mas malimpyo ini nga kamot.
“Indi siya sagad wakal sa media kay ang gina-akusar ya, indi kawatan. Siguro, kun siya ang may kustodiya sa kuwarta sang PPA, dugay na nadula. But kami ya nga mga Biron waay kami gapangawat. Bal-an niyo man tanan nga halin sang pag-umpisa ko sa pulitika, may nabatian kamo nga ni singko sentimo gin-remedyo sang mga Biron?,” pahayag sini.
Ginpahayag sini nga ini nga “ridiculous” nga bagay ang ginahimo lang nga isyu bangud sa pulitika.
“People would never believe nga nadula kag nangawat kami. Why should I dignify the accusation sang isa ka tulisan nga pulis, indi bala? Kilala niyo man ang pagkatawo ni Cong. Ferj Biron. I entered politics and public service with clean hands, and I will also exit politics and public service with cleaner hands,” dugang sini.
Nahibaluan nga ginabati-bati nga mapadalagan si Sustento sa pagka-kongresista sa fourth district nga baluwarte sang mga Biron, samtang una naman nga ginpahayag ni Rep. Biron nga ginakonsiderar sini ang reelection sa sa 2025 midterm elections.
“Ara lang daw ang kwarta intact pero asta sbng nga adlaw wala dyapon guinapakita sa madlang people ang kwarta sang port kag shares sang PPA. Wala man kmi naga hambal nga ginkawat mo ang kwarta ka port. Defensive ka gid yah. Insa tuod gd Ferj kay may nadula nga kwarta daw maguwa kana sa panit mo ginapamangkot ka lng sang mga friends naton sa media,” kabahin sang post ni Sustento matapos ang interview kay Biron.##
