Ginakabig nga isa sa mga nagapanguna nga rason sang pagpugok sang trapiko sa syudad amo ang wala pagsunod sang pila ka mga drivers sa ginatalana nga loading kag unloading bays.
Base sa datos, masobra 850 ka loading kag unloading signages ang ginpahamtang sang city government bilang tikang pagsolbar sang traffic congestion.
Apisar sina madamo sa gihapon sang mga drivers ang nagapapanaog kag nagapasakay sang pasahero sa indi ginatalana nga lugar.
Sa pagpakig-angot sang Bombo Radyo kay Chairman Boyet Parcon, head sang Western Visayas Transport Cooperative (WVTC) iya ginapahayg nga gina-engganyo nila ang ila mga drivers nga sundon ang loading kag unloading regulations.
Suno sa iya, ginamonitor nila ang ila mga driver sa ila headquarters kag ginacall out gilayon ang mga naga-lapas, lakip na ang paghatag sang nagakaigo nga sanction.
Dugang pa ni Parcon, ginapanawagan man nila ang mas aktibo kag maid-id nga pagbantay sang mga traffic enforcers sa ila tagsa ka Area of Responsibility (AOR) agud masiguro ang husto nga pagpatuman sang ordinansa.
Ginpahayag man ni Parcon nga madugay na nga ginapatuman sang city government ang loading kag unloading ordinance tungod nagahatag ini sang sigurado nga lugar para sa mga pasahero.
Nagalaum man ang ila kooperatiba nga pinaagi sa kooperasyon sang mga driver, commuters kag traffic enforcers, mangin matawhay ang dalagan sang trapiko sa syudad.
