Ginpaidalom na sa dengue outbreak ang bug-os nga Western Visayas.
Ini ang kasunod sang pagpanguna na sang Rehiyon 6 sang may pinakamadamo nga kaso sang dengue hemorrhagic fever sa bilog nga Pilipinas nga naglab-ot na sa 14,230 kag 81 na ang napatay.
Sa ginpatigayon nga video conference sa talatapan sang Department of Health Region 6, ginrekomendar ni Dr. Marlyn Convocar, Regional Director sang DOH-6 kay Department of Health Secretary Francisco Duque III ang pagpaidalom sa dengue outbreak sa bilog nga Western Visayas magluwas lang sa Negros Occidental nga ipaidalom lang sa ‘Alert Status’.
Ini ang gilayon man nga gin-aprubahan sang tiglikom.
Nahibaluan nga nagapanguna ang Iloilo nga may 5,435 ka kaso sang dengue; ginasundan sang Negros Occidental nga may 3,004 , Capiz nga may 2,202; Aklan nga may 1,567 ; Iloilo City nga may 618; Bacolod City nga may 504; Guimaras nga may 493; kag Antique nga may 407.
Samtang, sa mortality rate naman, nagapanguna ang Negros Occidental nga may 21 ka patay; ginasundan sang Iloilo Province nga may 20; Capiz nga may 14; Iloilo City nga may 6; Aklan nga may 4; kag may tagduha ka narekord nga patay sa Guimaras kag Bacolod City.
