Aprubado na sang World Bank ang utang sang Pilipinas nga $800-million ukon masobra P45.61-billion para sa pagsaylo sa clean energy kag sa pag-promote sang climate resilience sa pungsod.
Suno sa multilateral lender, nagpasugot ang board of directors sa loan agud nga masuportahan ang gobyerno sang Pilipinas sa pagpaninguha sini nga maka-adoptar sang clean energy technologies, mapasaka ang security kag competition sang electricity markets, kag mapaayo man ang water management.
Sa idalom sang First Energy Transition and Climate Resilience Development Policy Loan, ginalauman nga mapataas ang share sang renewable energy sa installed generation capacity sa 42 percent pag-abot sang 2027. Halin ini sa na-rekord nga 30 percent sang 2023.
Ini nga utang amo man ang gamiton sa pagbakal sang 1,000 megawatts sang bag-o nga offshore wind capacity amo man para sa implementasyon sang energy efficiency measures.
Dugang pa diri, ang loan amo man ang maga-suporta sa paggamit sang electric vehicles sa pampubliko nga sector.
Magabulig man ang programa nga mapaayo ang water resources management kag water supply and sanitation paagi sa mga reporma nga suno sa administrasyon magapaayo pa sang koordinasyon sang nasyonal kag local nga mga panguluhan.
“Focusing on renewable energy sources and using energy more efficiently can help the country reduce electricity costs, improve energy security and cut down on pollution,” suno sa statement ni World Bank division director for the Philippines, Malaysia and Brunei Zafer Mustafao?lu. “Using more affordable renewable energy in the energy and transport sectors is crucial for the Philippines to build a strong economy.”
Nahibaluan nga subong nga tuig, ang ginapreparahan sang Department of Energy amo ang tatlo ka green power auctions nga naga-cover sang solar, wind, hydropower, geothermal kag battery energy storage systems.#
