Magatambong si United States President Donald Trump sa final sang FIFA World Cup kun sa diin maga-atubangay ang reigning European champions nga Spain kag reigning South American champions kag defending world champions nga Argentina.
Suno kay White House Press Secretary Karoline Leavitt, ginapaabot sang presidente ang iya pagtambong sa championship match kag ginapabugal man sini ang kapasidad sang Amerika nga mag-host sang isa sa pinakadaku nga sporting event sa kalibutan.
Suno naman kay FIFA President Gianni Infantino, updan ni Trump ang FIFA sa paghatag sang World Cup trophy sa magadaog nga team sa New Jersey New York Stadium.
Ginpahayag ni Infantino nga madugay na nga plano nga makaupod ang presidente sang host country kag ang FIFA president sa pag-turn-over sang tropeo nga pareho sang ginhimo sa nagligad nga mga edisyon.
Sang 2022 World Cup sa Qatar, magkaupod nga naghatag sang tropeo ang Emir nga si Sheikh Tamim bin Hamad Al Thani kag si Infantino sa Argentina.
Sang 2018 naman sa Moscow, si Russian President Vladimir Putin ang nag-turn-over sang tropeo sa France.
Nahibaluan nga wala pa makatambong si Trump sa bisan ano nga hampang sa sini nga World Cup, kag indi man sigurado ang White House press secretary kun sin-o sa Spain kag Argentina ang suportahan sang US President.
Antes ang championship match, matambong man si Trump sa isa ka FIFA reception nga himuon sa Trump Tower sa New York City.
Patigayunon ang final match sa World Cup sa Lunes, alas tres sang kaagahon, oras diri sa Pilipinas.
