Ginkakas sang Kamara si Ako Bicol party-list Rep. Zaldy Co bilang chairperson sang makagagahum nga Committee on Appropriations.
Mismo si presidential son kag Senior Deputy Majority Leader kag Ilocos Norte Rep. Sandro Marcos ang nag-mosyon nga bakantehon ang posisyon nga gina-uyatan anay ni Co.
Wala sang anuman nga pagpamalabag nga natabo kag sunod nga gin-aprubahan ni House Speaker Martin Romualdez approved.
Masobra isa ka oras matapos natabo ini sa session, nag-release sang statement si Co nga nagasiling nga ang iya ikaayong lawas amo ang nagtulod sa iya desisyon sa pagpanaog sa pwesto sa committee.
Ginpahayag sini nga kinahanglan niya nga pasulabihon ang pagpabulong. Dugang sini, nagapasalamat siya sa pagsalig nga ginhatag sa iya sang Kamara.
“I extend my heartfelt gratitude to the majority in Congress for graciously accepting my decision to step down as Chairman of the House Committee on Appropriations. This decision, made with a heavy heart, is driven by pressing health concerns. The highly demanding nature of my role has taken its toll, and I now need to prioritize seeking the medical attention necessary for my well-being,” pahayag sini.
Si Co amo ang nag-oversee sa pagpasar sang Kamara sang 2025 budget nga balor P6.352 trillion.
Nangin kontrobersyal ini bangud sa mga reklamo sa alokasyon sang pondo sa pila ka mga serbisyo kag paghatag man sang budget sa pila ka items nga gintawag sang iban nga kritiko nga pork barrel. Lakip diri ang P26 billion nga Ayuda para sa Kapos ang Kita Program (AKAP).
Matandaan nga bangud sini nga mga kontrobersiya, naatrasar ang pagpirma ni President Bongbong Marcos sa budget antes dalayon nga gindayon sang Disyembre 30 matapos ang maid-id nga pagproseso.
Nahibaluan nga ini ang ikaduha nga termino ni Co bilang kongresista kag bantog siya nga negosyante sa Bicol region.
Sa iya termino bilang appropriations panel chairperson, may mga kontrobersiya ini nga ginkaulamiran kaangay sang indi paghangpanay batok sa high-profile politicians lakip sanday Albay 1st District Representative Edcel Lagman, Senator Joel Villanueva, Davao City 1st District Representative Paolo Duterte, kag mangin si Vice President Sara Duterte.
Matandaan nga sang Septyembre 2024, ginmensyonar ni Sara si Speaker Martin Romualdez kag si Co nga amo ang nagakontrol sang national budget apang pareho nga ginpanginwala sang duha ini nga alegasyon.
