Gintawag ni Iloilo City Lone District Representative Julienne Baronda nga kabutigan lang kag ‘black propaganda’ ang mga isyu nga ginhaboy batok sa iya.
Ini may kaangtanan sa ginaalegar nga mga delayed nga mga proyekto nga iya ginpatuman sa syudad.
Sa interview sang Bombo Radyo kay Rep. Baronda, iya ginpahayag nga may yara sang pondo para matapos ang mga proyekto apang mismo ang mga opisyal sang syudad ang kabangdanan kun ngaa wala ini matapos bangud mismo ang city council ang nag-revoke sang otoridad sadto sang DPWH-Iloilo City District Engineering Office (ICDEO) sa pag-construct sang pila ka mga proyekto.
Suno kay Baronda, nagapanigpot na lang sang isyu ang pihak nga grupo agud lamang nga higkuan ang iya pangalan.
Sa bahin sang Mandurriao Public Market, ginbasol man ni Baronda ang kontraktor nga suno sa iya, nanghulam lang sang license agud makontrata ang amo nga proyekto rason nga nag-angkon sang problema ang proyekto kag na-delay.
Nahibaluan nga ang kontraktor sang Mandurriao Public Market amo si former councilor Plaridel Nava nga kritiko man sang mamalidha.
May kaangtanan naman sa pag-uyat ni Nava sang kontrata sa ginatukod nga Mandurriao Public Market, ginkwestyon ni Baronda kun mahimo nga mag-uyat sang kontrata ang suno sa iya ‘bogus’ nga kontraktor kag posible nga ma-revoke pa ang license sang matuod nga tag-iya sang lisensya.
